Balade 407 : Helas ! Amour, je me guermente a plain (DXX)

Autre Balade

                        Helas ! Amour, je me guermente a[1] plain,
                        Navréz au cuer d’amoureuse pointure
                        Pour la biauté de ma dame que j’aym,
                        Treslong temps a, plus qu’autre creature,
5                      Car nuit et jour croist en moy mon ardure
                        Que ne lui ose dire n’amentevoir :
                        Pour Dieu, fay lui ma voulenté savoir !

                        Car quant a moy c’est mon lieu souverain,
                        C’est mon desir, mon penser et ma cure,
10                    Tout mon espoir, mon paradis mondain,
                        M’amour, mon bien, toute ma nourriture,
                        Qui par semblant voit asséz que j’endure.
                        Mais quant de ce ne se veult percevoir,
                        Pour Dieu, fay lui ma voulenté savoir !

15                    Ou il me fault estre destruit a plain,
                        Car plus la voy, plus est ma douleure durer.
                        Quant le semblant voy labourer en vain,
                        J’apperçoy bien qu’Amour de moy n’a cure.                                     166c
                        Helas ! Pité, vers ma dame procure
20                    Respit de mort. Amour, or lui dy voir :
                        Pour Dieu, fay lui ma voulenté savoir !

[1] Saint Hilaire corrige en et