Balade 405 : Se Dieu m’avoit octroyé mon souhait (DXVIII)
Autre Balade
Se Dieu m’avoit octroyé mon souhait,
En ce monde plus ne souhaideroie
Fors vous, dame, qui par vo doulx attrait
Soudainement m’avéz mis en la voye 166a
5 De recevoir tout dueil ou toute joye,
Quant par vo[1] tresdoulx regart
Joye me vient, et dueil de l’autre part
Me puet venir pour reffus esperer,
Par dur espoir qui ces .ii. me depart,
10 Or vueillés donc mon fait considerer.
Car vous avéz gent corps, le plus parfait
Et plus humble que dire ne pourroie,
Beauté en tout et bonté qui vous fait
Si resplendir que le cuer m’en rejoye[2].
15 Donc convient il que Pité vous ravoye
A doulz espoir qui repart
Maint langoureux. Lors aroie l’espart
De cel espoir dont vient le doulx penser
Qui mon las cuer tourmente main et tart :
20 Or vueillés donc mon fait considerer.
Ou autrement tout mon bien se deffait.
Et suy destruis quelque part que je soie.
Joye me fuit, douleur a moy se trait.
Tout desespoir et la mort me convoie,
25 […][3]
Desir m’assault, penser m’art,
De male heure furent vostre œil respart
Sur mon las cuer, qui lui fait endurer
Toute langueur par leur amoureux art :
30 Or vueillés donc mon fait considerer.
[1] Ms. vostre
[2] Ms. resoye
[3] Vers non édité ou vers manquant non signalé
