Balade 404 : Je vous conjur sur armes, sur amours (DXVII)
Autre Balade
Je vous conjur sur armes, sur amours,
Sur tous deduis, sur l’amoureuse vie,
Sur doulz pensers, sur piteuse clamours,
Sur les desirs et d’amant et d’amie,
5 Sur doulz espoir et sur leur compaignie,
Sur les plaisirs et l’octroy c’om attent,
Que vous dictes, et si ne mentéz mie, 165d,
Ou la belle est a qui vostre cuer tent.
Envor requier sur les souspirs et plours,
10 Sur la paour c’om ne vous escondie,
Sur les parlers et les envieux tours
Des mesdisans et sur la maladie
C’om a d’amer, et la paour d’Envie
Et de Dangier avecques Faulx Semblant,
15 Que sanz mentir me diéz en l’oye
Ou est la belle a qui vostre cuer tent.
En quel marche est son arroy, ses atours.
Se bourgoise est ou de noble lignie,
Doulce, plaisant, saige et de bonnes mours,
20 Vielle ou jeune, belle, cointe ou jolie,
Humble en ses fais, et s’elle a chiere lie.
Et quelz vertus sa noblesce comprent,
Et au surplus nomméz la seigneurie
Ou est la belle a qui vostre cuer tent.
L’envoy
25 Prince[1], en tel cas ne doit mentir Amours.
Dictes le voir, sauvéz toutes honnours,
Sur le conjur qu’a ses subgiéz aprent.
Car je croy bien que c’est la flour des flours,
Et me dictes quel part siet li demours
30 Ou la belle est a qui vostre cuer tent.
[1] Ms. Princes
