Balade 403 : Adieu le bel, le bon, le gracieux (DXVI)

Autre Balade

                        Adieu le bel, le bon, le gracieux,
                        Le noble cuer, de tous biens renommé,
                        Gent corps, puissant en tous fais, vertueux,
                        Humble, hardy, courtois et bien amé,
5                      Larges en dons, Alixandre nommé,
                        De qui renoms et gentillesce estrive,
                        Adieu, adieu, l’un des meilleurs qui vive !

                        Pour vo depart est mes cuers douloureux
                        Qui au vostre est parfaitement fermé,
10                    Comme au meilleur et au plus amoureux
                        Et le plus vray qui oncques feust formé.
                        N’estre de vous ne puet plus bel armé
                        Ne que chascun plus voulentiers poursuive.
                        Adieu, adieu, l’un des meilleurs qui vive !

15                    Soiéz toudis vaillans, larges et preux,
                        Car de long temps l’avéz acoustumé,
                        Et en voz fais de victoire piteux,
                        Et ne soiés ja d’onneur diffamé.
                        Car noz deux cuers sont si un confermé
20                    Qu’estre ne puis fors pour vo mal chetive.
                        Adieu, adieu, l’un des meilleurs qui vive !