Balade 402 : Adieu, adieu, tresdoulce creature (DXV)

Balade

                        Adieu, adieu, tresdoulce[1] creature,
                        Adieu, mon bien, m’esperance et m’amour,
                        Adieu, biauté, toute[2] parfaite et pure,
                        Adieu, gent corps, adieu, dame d’onnour,
5                      Adieu, regart plain de toute douçour,
                        Adieu, [adieu], franc cuer et plain de joye :
                        Je n’aray bien jusques je vous revoye.

                        Veoir ne puis comment mon las cuer dure
                        Quant je remir vo gracieux atour,
10                    Vo doulx parler, vostre belle figure,
                        Qui sur toutes estes la doulce flour.
                        Ce me fera souspirer en destour.
                        Pour mon depart n’est riens qui me resjoye.
                        Je n’aray bien jusques je vous revoye.

15                    Or vueille Amour, Pitié, Raison, Droiture,
                        Desir, Plaisir, Espoir, Sens et Valour,
                        Doulx Souvenir, veoir ce que j’endure
                        Et concevoir mon tresdouloureux plour.
                        Et vous aussi, qui savéz ma doulour,
20                    Vueillés souffrir que prochain de vous soie :                                   165c
                        Je n’aray bien jusques je vous revoie.

[1] Ms. trestoute

[2] Ms. toute beauté