Balade 401 : Pour souvenir qui souvent me resveille (DXIV)

Balade

                        Pour souvenir qui souvent me resveille,
                        Et pour desir qui me tient prisonnier,
                        Et doulx penser qui me brait a l’oreille,
                        M’a convenu maintes foiz deslogier.
5                                  Et pour ce, ou doulx mois de May,
                        N’a pas long temps que je m’acheminay
                        En regardant du bel ciel la venue[1].
                        Mais ou regart tant de bel regarday
                        C’oncques encor ne vy si belle nue.

10                    Car sa couleur estoit un pou vermeille
                        Et plus blanche que rose de rosier.
                        Estelléz fu le ciel a grant merveille.
                        Le jour venoit celle nue esclairer
                                    D’un si tresgracieux ray,
15                    Qu’avis me fu que tout renluminay                                                   165b
                        De la beauté dont elle estoit ferue.
                        Tant que je dis et, par m’ame, c’est vray,
                        C’oncques encor ne vy si belle nue.

                        Mais de doulceur estoit la nonpareille
20                    Celle nue qui tant fait a prisier,
                        Qu’a son venir toute flour s’appareille.
                        L’air endoucist lors en maint biau vergier.
                                    La doulce aloe escoutay,
                        Le rossignol et maint autre oisel gay.
25                    Par lui estoit la terre revestue
                        De tant de fleurs que je dy et diray
                        C’oncques encor ne vy si belle nue.

[1] Ms. bonne