Balade 400 : Se je me plains, tristes et douloureux (DXIII)

Autre Balade

                        Se je me plains, triste[s] et douloureux,
                        Mornes et mas, dolens et esbahis,
                        Par tout le corps plain des maulx amoureux
                        Dont je ne puis par mire estre gueris,
5                      Je n’ay pas tort, se je suy assaillis[1]
                        De Faulx Parler, de Dangier et d’Envie,
                        De Mesdisanz[2] et de tous leurs amis :                                               165a
                        Maudite soit mauvaise Jalousie !

                        Quant je remir le gent corps savoureux,
10                    La grant biauté, le maintien et l’avis
                        De ma dame pour qui suy langoureux,
                        Son noble atour et son gracieux vis,
                        Tellement suis de son amour ravis
                        Que je languis quant vir ne la[3] puis mie.
15                    Las ! ce me font mes mortelz ennemis.
                        Maudite soit mauvaise Jalousie !

                        Mais ja pour ce se je suy souffreteux
                        Par faulx rappors et par envieux dis,
                        Loing de la belle aux doulx yeux gracieux,
20                    Je ne lairay que ne l’ayme toudis.
                        Car je ne puis en ce monde avoir pis
                        Que d’eslongier sa doulce compaignie.
                        Pour ce me voy jusqu’a mort entrepris :
                        Maudit soit mauvaise Jalousie !

[1] Ms. assailly

[2] Saint Hilaire corrige en Mesdisance

[3] Ms. le