Balade 399 : Comparer puis a toutes les vertus (DXII)

                        Comparer puis a toutes les vertus                                                    164d
                        Celle pour qui je suy en tel destresce.
                        D’Umilité est ses corps revestus,
                        Et pour donner la gouverne Largesce,
5                      Pité la suit et Charité l’adresce,
                        Abstinence la scet bien aresner,
                        Pacience garde c’om ne la blece :
                        On ne pourroit meilleur dame trouver.

                        Humble la voy en gracieux reffus
10                    Vers un chascun qui devers lui s’adresce
                        Pour son honneur, mais donner au surplus
                        Scet largement toute joye et leesce.
                        Piteusement les desvoiéz radresce,
                        Mais Charité la veult a ce mener
15                    Que d’autrui mal ne puet avoir leesce :
                        On ne pourroit meilleur dame trouver.

                        Pour lui servir suy a sa court venus.
                        Son servant suy et elle est ma maistresse :
                        Par sa douçour fu ainsi retenus.
20                    Abstinence contraint si sa jeunesce
                        Qu’il n’est vice nul dont elle s’apparesse.
                        Belle et bonne est et tresdoulce en parler.
                        Arbres d’onneur est, Juno la deesse :
                        On ne pourroit meilleur dame trouver.