Balade 398 : Puisque je voy le printemps revenir (DXI)

Autre Balade

                        Puisque je voy le printemps revenir,
                        Et puisque j’oy les doux chans des osiaux,
                        Et es vergiés voy l’erbete venir,
                        Les prez verdir, florir les arbirissiaux,
5                      Et quant je voy courre les grans ruissiaux,
                        Tant c’om se puet mirer en la fontaine
                        Mieulx que ne fist Narcizus li tresbiaux,
                        Je vueil amer sanz pensee villaine.

                        D’Amours doit lors tous amans souvenir.
10                    Le rossignol crie sur les rainssiaux,
                        Vray messaige d’amour entretenir :
                        Occy, occy ! entre vous, damoisiaux,
                        Faictes de fleurs et de fueilles chapiaux,
                        Ayme chascun sa dame souveraine.
15                    Et quant tel cry se fait especiaulx,
                        Je vueil amer sanz pensee villaine.

                        Les oisiaux voy deux a deux conjoir,
                        Biches et cerfs, sengliers, dains et chevriaux,
                        Et en ce temps pour amours resjoir,
20                    Doit doivent mieulx et naturelment ciaulx
                        Leur dame amer qui raison ont en yaux,
                        Quant son feru en l’amoureuse vayne
                        Du dart d’Amours, dont j’ay .iiii. carriaux :
                        Je vueil amer sanz pensee villaine.