Balade 397 : Oncques ne fu fors d’Amours le message (DX)
Autre Balade
Oncques ne fu fors d’Amours le message,
Sanz y avoir retenue n’estat,
Celer ses fais, escripre son langaige,
Et pour s’onneur[1], acquerir maint debat,
5 Aler de nuit, estre son advocat,
Sens[2] pension, ne nul guerdon n’y truis,
Fors c’om m’a dit, de quoy je suy tout mat,
Que les chevaulx tendray des ors a l’uis.
Je prise mieulx des genz d’armes l’usage,
10 Pour ce a Amour de mon fait me debat.
D’un varlet font, quant il a esté page,
Homme d’armes, et ne sont pas ingrat.
Mais j’ay servi et va mon fait de plat.
D’Amours me plaing a tous tant com je puis,
15 Qui en tous lieux dit ou elle s’embat
Que les chevaulx tendray des or a l’uis.
Dont puet venir a Amour tel courage
Qu’a l’un donne, sanz raison l’autre bat.
Au desloial destrempe doulx buvrage,
20 Et au loyal secret tence et combat ?
Le fort verse le souffreteux et bat.
Goute n’y voy ne que s’il estoit nuys.
Je la reny, puisqu’en disant s’esbat
Que les chevaulx tendray des or a l’uys.
25 Prince, qui sert sanz querir avantage, 164c
Quant il est vieulx, on lui met sus la rage.
A chascun fait bon trouver son partuis.
Qui n’a du vin, si quiere du raemplage.
Amour m’a dit (est ce biau vasselage ?)
30 Que les chevaulx tendray des or a l’uis.
[1] Ms. sonvenir
[2] Saint Hilaire corrige en Sans
