Balade 396 : Comparer puis asséz a .ii. ydoles (DIX)

Balade

                        Comparer puis asséz a .ii. ydoles
                        Homme et femme qui ont entendement,
                        S’ilz n’ont amour. Ilz ont pensees foles,
                        Car ils ne sont fors pierres seulement,
5                      Quant il n’yst d’eulx joie n’esbatement,
                        Fruit ne doulceur, deduit, soulas ne festes,
                        A blasmer sont et leur contenement :
                        Ilz valent moins, en ce cas, que les bestes.

                        Car en eulx n’a ne qu’en pierres paroles,
10                    Ymages sont qui n’ont nul sentement.
                        Et pour ce doivent telles genz sur escoles,
                        Et en leurs cuers mettre l’avenement
                        De vraye amour et bien songneusement,
                        Et a amer avoir pensees prestes.
15                    Et par ma foy s’il le font autrement,
                        Ilz valent pis, en ce cas, que les bestes.

                        Pour ce leur sont donnees les chars moles.
                        Or ayment donc l’un l’autre loyalment.
                        Hommes sont folz et les dames sont foles                                      164b
20                    Quant ilz n’ayment bien et honnestement.
                        Car difference a entre homme et jument :
                        Les uns ont bas, les autres hault les testes.
                        Et quant telz genz n’ont leur droit mouvement,
                        Ilz valent pis, en ce cas, que les bestes.