Balade 393 : Se je peusse mon cuer de trahison (DVI)

Autre Balade

                        Se je peusse mon cuer de trahison
                        Sauf mon honneur, combatre et appeler,
                        J’ay cause asséz de tresbonne achoison                                           163c
                        De ce faire, qu’il m’a fait esperer,
5                      Et pour certain, que je devoie amer
                        Dame qui est de tous biens renommee,
                        Qui m’aymeroit de vray cuer sanz fausser.
                        Mais j’ay du tout failly a ma pensee.

                        Combien que j’ay par bonne entencion
10                    Celle servi que je n’ose nommer,
                        Par vray desir et par mainte saison,
                        Corps et avoir lui ay voulu donner,
                        Et a bien sceu que tout abandonner
                        Lui vouloie, mais pas[1] ne lui agree.
15                    Mon cuer trahy m’a pour bien desirer,
                        Mais j’ay du tout failli a ma pensee.

                        Et par ma foy oncques tel desraison
                        Cuer a son corps ne puet ymaginer
                        De lui donner espoir de garison,
20                    Et par mesdit en derrier rebouter.
                        Car oncques jour Amour ne voult monstrer
                        A moy doubteux de dame desiree.
                        Le cuer dit bien pour le corps amuser,
                        Mais j’ay du tout failly a ma pensee.

[1] Ms. pas bien