Balade 392 : Par le renom de vostre grant biauté (DV)

Autre Balade

                       Par le renom de vostre grant biauté
                        Et le gent corps de vo doulce personne,
                        Le bien, l’onneur, la parfaite bonté,
                        Et les vertus que un chascun vous donne,
5                                  A veoir vous desiroie
                        Plus que dire, dame, ne vous pourroie.
                        Dame, quant j’ay veu vo[1] contenement,
                        Voz grans bontéz descripre ne saroie :
                        Benoit soit Dieux qui vous fist ellement.

10                    Car vous estes fourme d’umilité,
                        Saige en voz diz, qui bien vous araisonne,
                        Large en honneur, debonnaire en pitié,
                        Humble envers tous, tresloyal, belle et bonne,
                                    Et de maintien simple et quoye.
15                    N’est si dolent, s’il vous voit, qui n’ait joye.
                        Tant est voz corps de doulx contenement,
                        Que oublier nul jour ne le pourroie :
                        Benoit soit Diex[2] qui vous fist tellement.

                        Quant sur toutes avéz la dignité
20                    Et de tous biens estes escu et bonne,
                        Et qu’en vous n’a fors pure verité,
                        Et grace en vous a tousjours s’abandonne,
                                    Plus souhaidier n’oseroie
                        Fors seulement que chascun jour vous voye.
25                    Plus ne requier pour mon nourrissement.
                        Lors diray [je] quelque part que je soye :
                        ― Benoit soit Dieux qui vous fist tellement.

[1] Ms. vostre

[2] Saint Hilaire corrige en iIDeux