Balade 391 : Se les vertus et les graces mondaines (DIV)

Balade

                        Se les vertus et les graces mondaines
                        C’onques furent mises en corps humain,
                        Et les beautéz des deesses humaines
                        Revenoient en ce siecle mondain,
5                      Et feussent vif tuit li mort escripvain,
                        Et parlassent ceulx qui ont perdu vie,
                        Ancre et papier ne souffiroit ce mie
                        Pour escripre les biautéz et les biens,
                        Les sens, honneur, bonté et courtoisie
10                    Que ma dame a, non mienne, et je suy siens.

                        Sa grant biauté a trespassé les vaynes
                        De mon las corps, qui se traveille en vain
                        Par ses regars et visions soubdaines,
                        Dont je suy pris mieulx que poisson a l’ain.
15                    Merveille n’est se je la doubte et l’aim,
                        Quant sur toutes la voy la plus prisee,
                        La plus tresdoulce et la mieux enseignee,
                        Qui en honneur ne se doubte de riens.
                        Prisier, doubter doy donc la seigneurie
20                    Que ma dame a, non mienne, et je suy siens.

                        C’est le tresor des vertus souveraines
                        Et le mirour de toutes pour certain.
                        De seur[e]té la tour et drois demaines
                        Ou chascune se doit mirer a plain.
25                    Elle a mon cuer, mais de pité suis plain
                        Et de desir qui trop me fait d’envie.
                        Or n’en scet rien, c’est ce qui me guerrie.
                        Mercy lui cry. Pris suis en ses liens,
                        Quant j’aper[ç]oy le gent corps, la lignie                                          163a
30                    Que ma dame a, non mienne, et je suy siens.