Balade 390 : Amie, Amour, amant, avéz amé (DIII)

Autre Balade

                        Amie, Amour, amant, avéz amé
                        Tresloyalment le cours de vostre vie :
                        A mort[1], a tort vous a mesdiz, blamé
                        Trait[reus]ement et par mauvaise envie,
5                      Tant que partout sera la voix oye
                        De Loyaulté, qui par pleur douloureux
                        Crira par tout : ― Chascun s’oroison die.
                        Ploréz, priéz pour le vray amoureux.

                        A son vivant estoit loyal clamé.
10                    Trois furent bien[2] fermes en compaignie.
                        Adieu, doulx cuer, en tout bien renommé :
                        Traison a de vous fait departie.
                        Tousjours sera vostre ame repartie
                        Des souvenirs de mes pensers piteux,
15                    Crians pour vous, en mes lermes noye :
                        ― Ploréz, priéz pour le vray amoureux.

                        Hé ! my amis, qui vous a diffamé
                        Toudis soit il en la palus perie !
                        A tous jours mais a mon cuer affamé.
20                    Targedien, ce dueil n’oubliéz mie.
                        Toute se muert pour son amant amie :                                             163a
                        De legier crut les faulx rappors doubteux.
                        Ce l’a destruit, et pour ce a touz escrie :
                        Ploréz, priéz pour le vray amoureux.

[1] Saint Hilaire corrige en Amour

[2] Ms. un