Balade 389 : Amour est bien par son nom appelléz (DII)
Autre Balade
Amour est bien par son nom appelléz,
Mais il n’est pas toudiz ferme n’estables,
Car pluseurs sont par lui amis claméz
Aux quelz il est depuis trop variables.
5 De doulx en dur leur est espoir muables,
Car tel cuide q’Amour lui soit constans,
Quant il requiert les plaisirs honnorables,
C’om lui respont : ― Il n’est pas ore temps.
En un moment s’est Amour remuéz
10 Quant on cuide qu’il soit plus veritables.
Adonc de lui est autre amis améz.
Dieux ! du seigneur ! comme il est amiables,
Qui pour avoir en choses convoitables
Est au loyal sanz raison inconstens,
15 Pour autre amer qui meffait li estables,
C’om lui respont : ― Il n’est pas ore temps.
Telle amour est faulse desloyautéz,
Dont Faulx Semblant est le droit connestables.
Quant bien permet, c’est trop grant faulcetéz,
20 De rendre mal et d’estre remuables.
J’ay de ses mes esté servi aux tables 162d
De son hostel, a lui plus ne m’attens :
Adieu ! je voy, plus est homs serviables,
C’om lui respont : ― Il n’est pas ore temps.
L’envoy
25 Prince, au jour d’uy est Amour tel menéz,
Qui jolis n’est ou d’argent bien paréz,
Amer ne veult[1]. Las ! Amour, tu te vens
Aux cuers loyaulx. Amoureux ne secréz
Ne sera ja, puis que on est améz,
30 C’om lui respont : ― Il n’est pas ore temps.
[1] Ms. veulz
