Balade 386 : Chasse de chiens ne le voler d’oiseaulx (XDIX)

Autre Balade

                        Chasse de chiens ne le voler d’oiseaulx,                                           162a
                        Joustes, tournois, chanter ne karoler,
                        Avoir argent, pennes et draps nouviaulx,
                        [Ou] instrumens, ne saigement parler,
5                      Chevaulx courans, les autres surmonter
                        En tout honneur et en chevalerie,
                        Ne se peuent nullement comparer
                        Au doulx penser qu’amans a de s’amie.

                        Car d’Amours vient li souvenirs loyaulx
10                    Qui fait amant en honneur gouverner,
                        Armes porter, entreprendre cembiaulx,
                        Joye sentir, nette vie mener,
                        Estre jolis, son fait bien ordonner,
                        Prendre vertu, eschever villenie.
15                    Et tous ces poins puet noble cuer trouver
                        Au doulx penser qu’amans a de s’amie.

                        Il n’est printemps, roses, fleurs ne chappeaulx,
                        Riviere, boys, ne d’oisel le chanter,
                        Herbe, jardin, ne son de chalemeaulx,
20                    Gelee, lin, ne puissance de mer,
                        Qui vaille tant comme le bien amer,
                        Craindre et servir une dame en sa vie.
                        Faire le vueil pour vivre et pour regner
                        Au doulx penser qu’amans a de s’amie.