Balade 385 : Pour refroidir ma tresdure doulour (XDVIII)

Autre Balade

                        Pour refroidir ma tresdure doulour
                        Que souvenir m’a ou corps embrassee,
                        Envoiéz moy, chiere dame d’onnour,
                        De doulx espoir une seule rosee
5                      Ou j’ay du feu d’amoureuse pensee
                        Dont jamais jour sanz vous ne gueriray.
                        Mieulx m’en vauldroit une goute donnee
                        Que rousee ne d’avril, ne de may.

                        D’un seul penser me vendroit tel doulçour
10                    Partout de vous que creature nee
                        Ne pourroit cuer mettre en si grant baudour.
                        Se dedens moy estoit si l’yaue entr’e,
                        Ma grant doulour seroit toute lavee.
                        Jamais balme de tel doulçour n’aray.
15                    Mieulx me[1] vauldroit une goute donnee
                        Que rousee ne d’avril, ne de may.

                        Or ne[2] vueillés, tresprecieuse flour,
                        Mon cuer bruir, qui tant vous a amee
                        Et qui toudis croist plus en vostre amour.
20                    Mais la pluye de vo doulce nuee
                        Vueillés plouvoir pour adoucir l’entr’e
                        De mon las cuer sur moy, car trop bien say :
                        Mieulx m’en vauldroit une goute donnee
                        Que rousee ne d’avril, ne de may.

[1] Saint Hilaire corrige en m’en

[2] Ms. me