Balade 384 : Certes jamais ne quier avoir amy (XDVII)

Autre Balade

                        Certes jamais ne quier avoir amy
                        Se je ne l’ay bien condicionné :
                        Jeune, courtoys, cointe, appert et joly,
                        Humble, loyal, amoureux et secré,
5                      Saige en ses fais [et] preudome et discré,
                        Et qui partout ait bonne renommee,
                        Qui soit de Dieu et de ce monde amé :
                        De tel ami doit amie estre amee.

                        Qui vueille honneur et qui la quiere aussi,
10                    Et qui d’orgueil ne soit point diffamé,
                        Qui ayme Dieu et doubte ou cuer de lui,
                        Et de vices ne soit ja renommé.
                        En[1] tel ami doit estre ami clamé,
                        Et je vueil bien sa dame estre[2] clamee,
15                    Car puisqu’il est de telz vertus paré,
                        De tel ami doit amie estre amee.

                        Mais je ne sçay s’il est partout ainsy,
                        Ne se l’en a toust tel ami trouvé.
                        Saige dame doit aviser icy,
20                    Et s’amy prent, qu’il soit bien esprouvé.
                        Tant qu’il ne soit a honneur reprouvé,
                        Qu’il vueille amer par villaine pensee.
                        Car un amant doit estre a or pesé :                                                   161d
                        De tel ami doit amie estre amee.

[1] Saint Hilaire corrige en Un

[2] Ms. estre sa dame