Ballade 383 : Cuer, corps, penser, sens, maniere et avis (XDVI)

Autre Balade

                        Cuer[1], corps, penser, sens, maniere et avis,
                        Oir, veoir, sentir et odorer,
                        Ce que Nature et Dieu ont en moy mis,
                        Entendement et langue pour parler,
5                      A ce bon jour vous doing et vueil donner,
                        Et tous les biens que j’ay ne puis avoir,
                        Comme a celle que j’aym et doy amer :
                        Ce povre don vous plaise recevoir,

                        Ou autrement trop seray esbahis
10                    Et ne pourray le reffus endurer.
                        Mes corps sera de moy mesmes hays
                        Et me fauldra du tout desesperer.
                        Mon las de cuer ne vueillés si navrer,
                        Mais me faictes vo doulx plaisir savoir,
15                    Car a tousjours vueil vo serf demourer :
                        Ce povre don vous plaise recevoir.

                        Par vostre octroy pourray estre enrichis                                           161c
                        Et a tousjours en joie demourer,
                        Et par reffus triste[s] et desconfis,
20                    Et me fauldra a honneur labourer.
                        A ce bon jour que l’en doit estrener,
                        Dame, vueillés mon desir percevoir
                        Quant tout vous vueil ainsi abandonner :
                        Ce povre don vous plaise recevoir.

[1] Ms. Duer