Balade 382 : Ploréz, Amours, ploréz tous, amoureux (XDV)

Autre Balade

                        Ploréz, Amours, ploréz tous, amoureux.
                        Ploréz, dames du mondain paradis.
                        Ploréz, armes. Ploréz, hommes joyeux.
                        Ploréz, tous ceulx qui font par Amours dis.
5                      Ploréz Guichart d’Angle qui fu jadis
                        Tel chevalier et tel homme de guerre,
                        Que plus vaillant n’avoit en son pays :
                        Ploréz, Deduit, en l’ille d’Engleterre !

                        Car courtois fu, humble[s] et gracieux,
10                    Dansans, chantans, gays, joieux et jolis,
                        En fait d’armes puissant et vertueux,
                        Grans voiagiers, et poursuivoit toudis.                                             161b
                        Chascun l’amoit et il estoit amis
                        [A] trestous ceulz qui veulent honneur querre.
15                    Or l’a la mort a destruccion mis :
                        Ploréz, Deduit, en l’isle d’Engleterre !

                        Vestéz vous noir, toutes celles et ceulx
                        Qui en amours estes souvent ravis,
                        Faictes pour lui plaings et chans douloureux,
20                    Ploréz sa mort, soiés memoratis
                        Quelz homs se fu en joie et en delis,
                        Et que de tous vouloit l’amour acquerre.
                        Pour sa mort sont maintes gens esbahis :
                        Ploréz, Deduit, en l’isle d’Engleterre !