Balade 379 : Veoir ne puis ne bien considerer (XDII)
Balade
Veoir ne puis ne bien considerer
Comment je puisse appeler proprement
Les medisans qui tant peuent grever,
Et qui d’amours font le departement. 160c
5 Venymeux sont plus que ydre[1] le serpent,
Ne mors[2] de l’escorpion,
Et plus crueulx que gueule de lyon.
Quant faulsement ont en mainte contree.
Par leur langue plaine de trahison,
10 Maint vray amant et dame diffamee.
Aucuns peuvent du venin trespasser[3]
Par tryacle, du lyon ensement
Se puet l’en bien garantir et truser.
Mais il n’est nul qui peust au mesdisant
15 Resister n’a son venin trop cuisant.
C’est male pugnition[4].
Car sa voix va en toute region,
Dont la playe ne puet estre sanee.
Par ce ont destruit, selon m’entencion,
20 Maint vray amant et dame diffamee,
Basiliques les puis bien appeler,
Qui de son vir tue l’omme en present.
Ainsi font ilz, car de leur seul parler
Tuent amour et font maint cuer dolent :
25 Envenimé m’ont trop crueusement
Et piqué de leur syon,
Tant que je suy a tel destruction
Que se pitié n’est en ma dame nee,
Dire pourray qu’ilz ont, et sanz raison,
30 Maint vray amant et dame diffamee.
[1] Saint Hilaire corrige en que
[2] Ms. de mors
[3] Saint Hilaire corrige en respasser
[4] Saint Hilaire corrige en C’est trop male punction
