Balade 378 : Quant revenra le doulx [temps] amoureux (XDI)
Quant revenra le doulx [temps] amoureux, 160b
Que li amant aront joieuse vie
Et ne seront tristes ne souffreteux,
Ne si destraint de mesedit et d’envie
5 Comme ilz sont presentement ?
Je ne le sçay, trop tarde longuement
Aux nobles cuers plains d’onneur et de bien.
Or le doint Dieux venir prochainement,
Car meilleur[1] temps fu le temps ancien.
10 Les chevaliers estoient vertueux,
Et pour amours plains de chevalerie,
Loyaulx, secréz, friques et gracieux.
Chascun avoit lors sa dame, s’amie,
Et vivoient liement.
15 On les amoit aussi tresloyaulment
Et ne jangloit ne mesdisoit l’en rien.
Or m’esbahy quant chascun jangle et ment,
Car meilleur temps fu le temps ancien.
Les cuers gentilz sont les plus douloureux.
20 Encontre eulz regne orgueil et jalousie.
Qui ayme honneur a pou qu’il n’est tous seulz.
L’en treuve pou vray ami, ne amie,
Dont tout va chetivement.
Mais s’Amour veult, il yra autrement.
25 Si aront lors toute joie li sien,
Et maudiront ce chetif temps dolent,
Car meilleur temps fu le temps ancien.
[1] Ms. merveilleux
