Balade 377 : J’ay en amours si grant desir eu (XD)

Autre Balade

                        J’ay en amours si grant desir eu
                        C’oncques mais homs n’y pot si grant avoir.
                        Mais ce desir m’a trop fort deceu,
                        Car il m’a fait un plaisir concevoir
5                      Dont je ne puis guerredon recevoir.
                        Car quant je cuide estre bien avancié,
                        Je me treuve toudiz, au dire voir,
                        Que j’ay un pié deschaux, l’autre chaucié.

                        Mon grant desir est trop pou congneu,
10                    Car en tous cas vueil faire mon devoir
                        Au lieu que j’ay souverain esleu,
                        Que ma dame puet de certain savoir.
                        Mais par Dangier fault mon bien remanoir,
                        Et par Paour qui enchace Pité.
15                    Dont quant a my puet asséz apparoir
                        Que j’ay un pié deschaux, l’autre chaucié.

                        L’un pié deschaux, mon fait non congneu
                        Doit un chascun congnoistre et percevoir.
                        Un pié chaucié puet estre perceu
20                    Par la doulceur d’un gracieux espoir,
                        Par doulx regart, la mercy que j’espoir.
                        Car par ces deux ay guerdon esperé.
                        Mais s’ainsi n’est, je dy par desespoir :
                        Que j’ay un pié deschaux, l’autre chaucié.