Balade 376 : Beauté, bonté, honneur et courtoisie (CCCCLXXXIX)

Autre Balade

                        Beauté, bonté, honneur et courtoisie,
                        Noble maintien, gent corps et noble atour,
                        Humble parler et belle compaignie
                        Pour festoier toutes genz de valour,
5                      Dames plaisans, garnies de doulçour,
                        Qui tant faictes d’onneur a estrangiers,
                        De grans festes et de nobles mengiers,
                        Pour le depart dont je souspire et plaings,
                        Adieu te dy, noble cité de Rains.

10                    Sur toutes dois avoir la seigneurie,
                        Et, quant a moy, je te donne m’amour.
                        Tu es du roy et du sacre embelie,
                        Et si aymes ton naturel seignour,
                        Ses genz aussi : mais tu portes la flour
15                    De festoier et chanter voulentiers.
                        Dames, aiés les cuers frans et entiers !
                        En merciant de cuer a jointes mains,
                        Adieu te dy, noble cité de Rains.

                        On mayne en toy tresnoble et bonne vie.
20                    Du royaume es le droit chief et l’onnour.
                        Si me fait mal de toy la departie,
                        Et n’aray bien jusques a mon retour.
                        Devers Saint Lié me suis mis en destour.
                        Et tant com j’ay peu veir ses clochiers
25                    T’ay regardé, et par agenouilliers                                                      160a
                        Piteusement fu de dire contrains :
                        Adieu te dy, noble cité de Rains.