Balade 374 : A tous les biens c’om puet ymaginer (CCCCLXXXVII)
Autre Balade
A tous les biens c’om puet ymaginer
Dessoubz le ciel et es .iiii. elemens
Puis e doy bien ma dame comparer,
Car sa bonté, sa biauté et son sens,
5 Et le bon nom qu’elle a de toutes gens,
Son doulx maintien, son gent corps
Valent trop mieulx que nulz mondains tresors.
C’est droitement la fontaine de balme
Qui puet tous maulx guerir et gecter hors,
10 Si vueil tous temps pour lui porter la palme.
Et a palme la puis bien comparer
Qui est signes de doulx contenemens,
De ferme foy, de gracieux parler,
D’umbles regars, de plaisirs avenens.
15 C’est une fleur qui ne doubte les vens,
Dont li ange font leur pors.
Et ma dame a tout ce que je recors 159c
Plus que dame qui soit en ce royaume.
A froit jugier, c’est ma vie et ma mort :
20 Si vueil pour lui tous temps porter la palme.
Encontre lui ne pourroient venter
De leur delui les felons mesdisens :
Comme palme se veult droit porter :
Car plus saine est que le mirre et l’encens,
25 Et de tous maulx est ses corps ygnoscens.
C’est la pierre et li fins ors,
C’est ce que j’aym, c’est mes joyeux depors,
C’est li doulx temps qui en la mer[1] fait calme
Et les vaissiaulx arriver a bons pors :
30 Si vueil tous temps pour lui porter la palme.
[1] Ms. en balmer
