Balade 373 : Tresdoulx plaisir et maintien gracieux (CCCCLXXXVI)
Autre Balade
Tresdoulx plaisir et maintien gracieux,
Gent corps, joliz, paréz de noble atour,
Plaisant desir, souvenir amoureux,
Humble parler et regart de douçour,
5 Pour faire un cuer pasmer de fine amour,
Avéz, mes dames de pris,
De qui je suy enamouréz et pris
Plus que ne fu de Medee Jason.
Mais, en alant, couvréz trop vostre vis :
10 Si vous suppli, hausséz vo chapperon.
Lors verra l’en vo viaire et doulx yeux,
Que vous tenéz en merveilleux destour.
Dont pluseurs sont du veoir envieux,
Mais le grant ploy que vous portéz entour,
15 Vous cueuvre si que ce m’est grant douleur[1].
Pour Dieu, laissiéz telz habis.
Qui les trouva, de Dieu soit il maudis,
Car il ne fu oncques bon compaignon.
Face couvrir ne doit nulz qui soit vis :
20 Si vous suppli haussiéz vo chapperon.
Las ! com seroit en tous lieux merveilleux
Qui en printemps verroit couvert la flour
Qui doit donner les plaisirs savoureux
Et de qui vient la precieuse odour ! 159b
25 De vous est il autel, dames d’onnour.
Quant vous aléz par Paris,
Voz visaiges sont trop ensevelis.
Or vueillés donc oster ceste façon.
Trop vous messiet, se n’avéz corps jolis.
30 Si vous suppli, haussiéz vo chapperon.
L’envoy
Princes, dames de si plaisant acueil
Doivent oster la visiere[2] de l’œil,
Car autrement veoir ne la[3] puet on.
Lors aront corps et tout bien a mon vueil,
35 Et seray hors des maulx dont je me dueil :
Si leur suppli hausser leur chapperon.
[1] Saint Hilaire corrige en doulour
[2] Ms. vision
[3] Saint Hilaire corrige en les
