Balade 372 : Qui est le jour de [tres]toute l’annee (CCCCLXXXV)

Autre Balade

                        Qui est le jour de [tres]toute l’annee
                        Que dames ont plus especialment.
                        Que chascun[e] doit mieulx estre atournee,
                        Soy affubler et vestir richement,
5                      Et demener joye et esbatement ?
                        C’est ou doulx temps de consolacion,
                        Ou mois de May que on dit proprement
                        La feste aux dames, c’est a l’Ascencion.

                        Et certes c’est gracieuse journee
10                    Ou [un] chascun dit [tout] communement
                        Que dame doit estre sur vert paree,
                        C’om ait mouton gras[1], poree ensement,
                        Et blanche nappe ouvree nettement
                        En demonstrant la renovacion
15                    De ce doulx May, et sachiéz vrayement
                        La feste aux dames c’est a l’Ascencion.

                        Par la dame est la biauté figuree,
                        Par le mouton humble contenement,                                               159a
                        Et la purté, par blanche nappe ouvree.
20                    Par poree le doulx acointement,
                        Par la verdeur, fermeté d’ayment
                        Et par le jour toute perfection.
                        Dancéz, chantéz, menéz vous liement :
                        La feste aux dames c’est a l’Ascension.

[1] Ms. grasse