Balade 370 : Sur tous les lieux c’om puet ymaginer (CCCCLXXXIII)

Autre Balade

                        Sur tous les lieux c’om puet ymaginer
                        En lieu plaisant et en siege agreable,
                        Pour tous deduis avoir et pour finer
                        De ce qu’il fault a homme delitable,
5                                  Pour vivre et avoir cuer gay
                        Et demourer en ce doulx mois de May,
                        Et pour oir du rossignol le chant,
                        De tous oysiaux la douçour et le glay,
                        Je n’en sçay nul plus propre que Cachant.

10                    Jardins y a, riviere pour voler,
                        Sauvoirs dedens, garanne prouffitable,
                        Vignes entour pour l’ostel gouverner,
                        Coulombier, prés et mainte terre arable,                                         158c
                        <Granche, fontaine en .viii. lieux despensable,>[1]
15                                Arbres et noble saussay,
                        Garanne grant et bonne cave y sçay,
                        Estuves, baings et le ruissent courant.
                        De tous manoirs, pour vous dire le vray,
                        Je n’en sçay nul plus propre que Cachant.

20                    Pres de Paris une lieue trouver
                        Pourrés l’ostel en lieu tresconvenable.
                        Hors Gentilly vous fault acheminer.
                        Lors verrés vous l’enclos bel et estable :
                                    Pour tous cuers getter d’esmay,
25                    Plaisans odours de roses et de glay,
                        Petis bateaulx par ou on va peschant,
                        Et pour connins recouvrer sans delay
                        Je n’en scay nul plus propre que Cachant.

[1] Vers surnuméraire