Balade 368 : Je n’ay en l’an, mois, sepmaine, journee (CCCCLXXXI)

Autre Balade

                        Je n’ay en l’an, mois, sepmaine, journee,
                        Heure, moment, printemps, Avril ne May,
                        Bien ne doulçour ne joieuse pensee,
                        Fors que tristeur, pleur, doulour et esmay.                                      158a
5                                  Verdeur de riens ne me sert,
                        Paour m’ensaint et mon espoir se pert
                        Quant si loing suy de celle, au dire voir,
                        Qui par son bien tant de grace dessert
                        Qu’en lieu de vert me fault vestir le noir.

10                    Ou monde n’a dame mieulx renommee.
                        Las ! je ne sçay quant veoir la pourray,
                        Car trop loing suy de la doulce rosee
                        Ou cuer et corps et m’amour li laissay.
                                    Mieulx doy aler en desert
15                    Que cueillir may, car en riens ne m’appert
                        Que ma dame me daignast recevoir
                        En son servant, et pour ce asséz appert
                        Qu’en lieu de vert me fault vestir le noir.

                        Or lui doint Dieux tout ce qui lui agree,
20                    Car quant en lui[1] rien deviser ne sçay
                        Que Nature ne l’ait si bien formee,
                        Que plus belle jamais ne desirray.
                                    Et puis que j’ay tant souffert,
                        Vueille Pitié, quant mon las cuer la sert,
25                    Que d’elle puisse aucune grace avoir,
                        Ou a tousjours puis bien dire en appert
                        Qu’en lieu de vert me fault vestir le noir.

[1] Saint Hilaire corrige en quant a moi