Balade 367 : Ravis d’amours, trais d’un tresdoulx regart (CCCCLXXIX)

Balade

                        Ravis d’amours, trais d’un tresdoulx regart,
                        Oncques amant n’ot si doulce pointure.
                        Bon est le trait qui joye me depart.
                        Joyeusement m’a espoir pris en cure,
5                      Ne fors de lui et doulx octroy n’ay cure,
                        Tant suis espris de l’amoureuse flamme.
                        Tuit my desir sont et ma nourriture
                        En bien amer ma belle et bonne dame.

                        De lui me vient souvenir tempre et tart.
10                    Moult me merveil des œuvres de Nature,                                        157d
                        Ou de biauté pot figurer le quart,
                        Ne je ne sçay si ce fu avanture.
                        Trop est belle plus qu’autre creature,
                        Agu regart a, qui mon cuer enflame,
15                    Qui, jour et nuit tout mon pouoir espart
                        En bien amer ma bonne et belle dame.

                        Helas ! Pitié, sanz vous le cuer me part.
                        Vueillés mouvoir celle doulce figure,
                        Se vous pouéz, qu’elle soit de ma part.
20                    Tout vostre suis, sanz nulle mespresure.
                        Adonc aréz allegé mon ardure
                        Se vous faictes qu’elle m’ayme, par m’ame :
                        Car cuer et corps sera, tant que je dure,
                        En bien amer ma belle et bonne dame.