Balade 365 : Lasse, lasse, maleureuse, dolente (CCCCLXXVII)

Autre Balade amoureuse

                        Lasse, lasse, maleureuse, dolente !
                        Lente me voy, fors de souspirs et plaings.
                        Plains sont my jour d’annuy et de tourmente.
                        Mente qui veult, car mes cuers est certains,
5                      Tains jusqu’a mort et pour cellui que j’ains.
                        Ains mais ne fu dame si fort atainte.
                        Tainte me voy quant il m’ayme le mains.
                        Maints, entendéz ma piteuse complainte.

                        Plainte seray quant j’aym de vraye entente.
10                    Ente en semblant a doulce fueille et rains,
                        Rains en folour qui le semblant faulx plente,
                        Plente qui a deceu maintes et maints :
                        Mains, tuéz moy, quant il est si villains.
                        L’ayns je ? Nenil, puisqu’il m’a s’amour fainte.
15                    Fainte est s’amour par tel douleur par mains :
                        Maints, entendéz ma piteuse complainte.

                        De lui amer m’avoit mis en la sente.
                        Sente qui veult que d’autre est ses cuers sains.
                        Sains, vengiéz moy. Mes maulx vous represente.
20                    Presente suy, qui fais douloureux clains.
                        Clains m’en a Dieu, car mes cuers est emprains,
                        Prains de la mort qui m’a pour lui enceinte.
                        Sainte Juno, vez les maulx ou je mains !
                        Maints, entendéz ma piteuse complainte.