Balade 364 : En ce douls temps c’om se doit resjoir (CCCCLXXVI)

Balade amoureuse

                        En ce douls temps c’om se doit resjoir,
                        Qui commence le premier jour de May,
                        Et que l’en doit ses amours conjoir
                        Et de son cuer oster dueil et esmay,
5                      Soudainement en mon lit m’esveillay,
                        Car a Amours vouls rendre mon salu.
                        Mais d’oysel nul n’oy chanson ne glay,
                        Fors[1] seulement que le chant du cucu.

                        Adonc me pris forment a esbahir,
10                    Et de son chant durement me courçay
                        Qu’en lieu d’amer me rouvoit a hair :
                        A un auvant sur les champs regarday,
                        Mais je ne vy ne verdure ne glay.
                        Le temps sembloit Yver le malostru,
15                    Joie, deduit ne doulceur n’escoutay,
                        Fors seulement que le chant du cucu.

                        Mais pour mon dueil un pou aneantir
                        Me dist Pitéz : Ne laisse a estre gay.
                        L’en voit souvent son contraire avenir,
20                    Amours deffault, ne le temps n’est plus vray,
                        Esté est froiz, Yver chaut. Je ne sçay
                        Dont sont ores tel contraire venu,                                                     157b
                        Car l’en oit poy rossignol, papegay,
                        Fors seulement que le chant du cucu.

[1] Ms. Fort