Ballade 338bis : Pris m’a Amour, et si soudainement (CCCCLXXV)

Autre Balade[1]

                        Pris m’a Amour, et si soudainement,
                        Que je ne say se je dors ou je veille,
                        De la biauté, du doulx contenement,
                        Du gentil corps de vous qui n’a pareille.
5                      Et si m’ont mis telle chose en l’oreille
                        Vo doulx parler et vostre humble regart,
                        C’oncques mais homs ne fu, a son depart,
                        Ainsi d’amer d’amours enamouréz,
                        Si vous suppli que vous me secouréz.

10                    Car chascun jour ay, en un seul moment,
                        Mille pensers a vous, qui me resveille,
                        Dont ravis suis tresamoureusement.
                        Mais, en pensant, Paour trop me traveille
                        D’avoir reffus, et, se Pitié sommeille,
15                    Je suy perdu : or pry Dieu qu’il me gart
                        Et que Pitié vueille estre de ma part,
                        Ou je seray tristes et esplouréz :                                                       157a
                        Si vous suppli que vous me secouréz.

                        Voz homs devien et voz serfs ligement,
20                    A vous servir cuer et corps appareille.
                        De noz deux cuers desir l’assemblement
                        En tout honneur, et ce n’est pas merveille :
                        Contrains y suis, dame, vueille ou ne vueille.
                        Amours m’a trait de son amoureux dart,
25                    Car nuit et jour, main et soir, tempre et tart,
                        Est mon las cuer pour vous enlangouréz :
                        Si vous suppli que vous me secouréz.

[1] Pièce identique au folio 150d sous le n° CCCXLVIII