Balade 363 : M’amour, mon bien, ma joie et ma leesce (CCCCLXXIV)

Autre Balade

                        M’amour, mon bien, ma joie et ma leesce,
                        Mon doulx espoir, mon mondain paradis,
                        Tout mon honneur, mon tresor, ma richesce,
                        Mon hardement, mon sens et mon avis,
5                      Ma vie et mort, mes cuers, mes esperis
                                    Sont en la tresdoulce flour
                        Qui en bonté, en beauté, en valour,
                        Toutes dames de sa contree passe :
                        Jeune, gentil et de [tres]noble atour,
10                    Elle a de Dieu et du monde la grace.

                        Ferme est de cuer plus que fu Lucresse,
                        Et plus vaillant trop que Semiramis.
                        Humble en tous cas, et tant ayme Noblesce
                        Que tous les bons lui doivent estre amis.
15                    Par son bien sont les couars fais hardis
                                    Et amendé li meillour.
                        A toutes genz veult toudis faire honnour
                        Du sien donner : or queréz qui ce face !                                           156d
                        Et si ne het rien tant que deshonnour :
20                    Elle a de Dieu et du monde la grace.

                        Pour ce la tien de tous biens la dieuesse.
                        Qu’en un estat la trouverés toudis
                        Parfaite en tout, ne rien n’est qui la blesce,
                        N’oncques grever ne la porent mesdis
25                    N’envie aussi : Male Bouche ou Despis
                                    N’y saroient trouver tour.
                        C’est des meilleurs le chastel et la tour
                        Qui bien se scet garder en toute place.
                        Si n’ay pas tort, se je l’aym et aour :
30                    Elle a de Dieu et du monde la grace.