Balade 362 : Se triste suis, mas, dolens et pensis (CCCCLXXIII)

Autre Balade

                        Se triste suis, mas, dolens et pensis,
                        Plain de douleurs et de piteux regrés,
                        Las, douloureux, mornes et esbahis,
                        De joye loing et de desconfort prés,
5                      J’ai bien cause, dame, quant je vous lais
                        Et que partir me fault soubdainement.
                        Mar vy voz yeux par lesquelz [je] fu trais[1] :
                        Helas ! dame, quel dur departement !

                        Par vous veoir estoie resjois,
10                    Tout mon desir estoit en vous retrés,
                        S’en estoie gays, joyeux et jolis,
                        Car vo regart me confortoit adés.
                        Or languiray sanz avoir jour de paix,                                                 156c
                        Pour mon depart tresdouloureusement.
15                    Mieulx me vaulsist de non partir jamais :
                        Helas ! dame, que[l] dur departement !

                        Et ! nobles cuers, gent corps, gracieux vis,
                        Bonté, beauté plaine de doulx attrais,
                        De tout honneur paréz et assevis,
20                    Adieu vous dy, mais je say bien qu’aprés
                        Ce departir qui est obscur et les
                        Me convendra languir dolentement,
                        Se souvenir de moy n’est en vous fés :
                        Helas ! dame, quel dur departement !

[1] Ms. trahis