Balade 361 : Chascun des jours me semble une sepmaine (CCCCLXXII)

Balade

                        Chascun des jours me semble une sepmaine,
                        Et une nuit puis comparer au moys
                        Et au moys l’an, tant est dure ma paine
                        Pour les grans biens qu’en vous, dame congnois.
5                      Las ! ce me fait resveiller maintes foiz
                        Et destourner, tant que nul repos n’ay                                             156b
                        Par long demour dont je suy moult destrois :
                        Mais, se Dieu plaist, briefment vous reverray.

                        Car je vous aym plus que Paris Helaine,
10                    Et vous complaing de trespiteuse voix
                        Quant je vous sens de mon corps si lointaine.
                        Mais mon cuer dit : chascun jour je m’ennois,
                        Desir m’assault, plaisance n’esbanois
                        […]
15                    Dame, sanz vous langui oultre mon chois :
                        Mais, se Dieu [plaist], briefment vous reverray.

                        Si aray lors joye parfaite et saine
                        Que vraye amour doit donner de ses drois,
                        Et vous aussi, qui m’estes trescertaine,
20                    Aréz joye, qu’asséz le recongnois.
                        Nos .ii. cuers sont si conferméz par fois
                        Et en amours, que ja n’en doubteray.
                        En espoir vis et vivray ceste fois :
                        Mais, se Dieu plaist, briefment vous reverray.