Balade 360 : Maudis de Dieu et du monde hays (CCCCLXXI)

Autre Balade

                        Maudis de Dieu et du monde hays                                                    156a
                        Soit Faulx Rapport, mesdisans Male Bouche
                        Par qui je suis vers ma dame trahis,
                        Qui dit que j’ay dit et escript reprouche
5                                  De son doulx nom gracieux,
                        Dont j’ay le cuer si triste et douloureux
                        Que je ne sçay a qui prendre m’en doie,
                        Fors que menti si ont celles ou ceulx
                        Qui ont ce dit : penser ne l’oseroie.

10                    Contre raison suy forment envays.
                        Oncques ne fis ce qu’elle me [re]prouche
                        Ne cause n’ay, car il [n’]a au pays
                        Plus noble cuer, ne dame qui me touche
                                    Dont tant soie desireux.
15                    Se j’ay nul bien, c’est[1] par ses gracieux
                        Et doulx parlers, quelque part que je soie.
                        A tousjours mais soient cilz langoureux
                        Qui ont ce dit : penser ne l’oseroie.

                        Or lui suppli que je puisse estre ois,
20                    Ou je mourrai[2] [transiz] comme une souche.
                        Et c’elle[3] m’oit, je seray resjois.
                        Sinon la mort face faire une couche
                                    A moy dolent, souffreteux.
                        Comme l’aignel mourray entre les leupx
25                    Vray ygnoscent. Mais, se je m’escusoie,
                        Je feroie crever les envieux
                        Qui ont ce dit : penser ne l’oseroie.

[1] Ms. scest

[2] Ms. moureiz

[3] Saint Hilaire corrige en s’elle