Balade 358 : Chief d’Absalon, clere face d’Elayne (CCCCLXVIII)

Autre Balade

                        Chief d’Absalon, clere face d’Elayne,
                        Vers yeux rians, corps de gente façon,
                        Humble en vos fais, de toute biauté plaine,
                        Saige en parler, de[1] gracieux renom,
5                      On ne pourroit trouver en vous que bon.
                        Nature et Dieu vous ont telle fourmee
                        Que Passe-tout est vostre propre nom :
                        Pour ce estes vous de chascun bien amee.

                        Riviere estes, sourgon[2], puis et fontaine
10                    De tout honnour, la puisier la doit on,
                        De bel acueil la dame souveraine,
                        De biau maintien le royal confanon.
                        Nul ne vous suit qui ne soit, vueille ou non,
                        Preux et vaillans. Telle est vo destinee,
15                    Et vous avéz a pluseurs fait ce don :
                        Pour ce estes vous de chascun bien amee.

                        Aux desvoiéz estes la tresmontaine,
                        Vo doulx parler leur rent si tresdoulx son
                        Qu’au port d’onneur les radresce et ramaine.
20                    Et vo bonté est si sanz souspeçon
                        Que puis le temps David et Salomon
                        Ne fu dame de meilleur renommee
                        Mise en escript n’en livre n’en chançon :
                        Pour ce estes vous de chascun bien amee.

[1] Ms. et de

[2] Saint Hilaire corrige en surgeon