Balade 359 : Doulx esglantier, fresche rose de may (CCCCLXIX)

Autre Balade  155c

                        Doulx esglantier, fresche rose de may,
                        Liz vertueux, odorant violete,
                        Basiliquot, olive, fleur de glay,
                        Cedre en haulteur, tresdoulce pucellete,
5                      Marguerite, vertueuse florete,
                        De vo doulçour ne me puis estrangier :
                        Hault est le lieu dont vous fustes atraite.
                        Ou tel fleur croist a tresnoble vergier.

                        Je vous vy la, c’est ce dont je m’esmay,
10                    Si tresplaisant, si belle, si doucette,
                        Que des ce jour loyaulment vous aymay
                        Et vous offry cuer, corps d’amour parfaite.
                        Mais je ne poy a vous, humble par fette,
                        Dire mes maulx ne mon tronc arreger :
15                    Le balmier suy qui bien sçay, pure et nette,
                        Ou tel fleur croist a tresnoble vergier.

                        Consideréz donc les maulx que je tray
                        Et consentéz qu’aliance soit faicte
                        De ces deux fleurs. Par ce guery seray,
20                    Car yssir d’eulz puet tresnoble recepte,
                        Dont paix porra et joye estre refaicte
                        En pluseurs lieux qui sont en grant dangier.
                        Si feréz bien, car pour ce dy je et traitte :
                        Ou tel fleur croist a tresnoble vergier.