Balade 356 : Tresdoulx regart qui de moy chasséz hors (CCCCLXVI)
Autre Balade
Tresdoulx regart qui de moy chasséz hors
Les tenebres, comme fait la lumiere
Qui rent clarté et aux esperis mors
Fait retourner leur plaisance premiere
5 Par son veoir gracieux,
Ainsi m’ont fait, doulce dame, voz yeux
Qui m’ont rendu clarté, soulas et joye,
Et m’ont osté la doulour que j’avoie.
Car par penser estoit navréz mes corps,
10 Ne sanz vous n’est douleur que je ne quiere.
De voz grans biens sont en moy les remors,
Mais desespoir me vouloit mettre en bierre,
Se vos regars precieux
N’eussent gexté sur moy leurs raiz piteux
15 Qui ont chacié du tout tristesce en voie
Et m’ont osté la douleur que j’avoye.
De voz yeux n’est nulz plus riche tresors.
C’est bien raison que mes cuers vous ait chiere,
Quant par regart viennent mes doulx effors
20 Qui m’ont rendu espoir et lie chiere
Et du mal treslangoureux
Ou j’ay languy me font estre joyeux.
Voz yeux guery m’ont, et si languissoie, 155a
Et m’ont osté la douleur que j’avoie.
L’envoy
25 Princes, tant sont les regars amoureux,
Humbles et doulx, courtois et savoureux
De ma dame tresbelle, bonne et quoye,
Qu’ilz ont feny mes maulx tresdouloureux
Et ont guery moy mourant, souffreteux,
30 Et m’ont osté la doulour que j’avoie.
