Balade 355 : Hardi couart, moudreur en trahison (CCCCLXV)

Balade

                        Hardi couart, moudreur en trahison,
                        Du fort venin qui mourdrit[1] Alixandre
                        Fu le mauvais qui brassa la poison :
                        Hardi en ce qu’il osa entreprendre
5                                  Soubz signe d’amour et paix.
                        Couart en ce qu’il n’eust osé jamais
                        Lui regarder de vertueux courage
                        Ne l’assaillir. C’est un vices trop lais :
                        En Orient servent de tel buvrage.

10                    En Espaigne, Calabre et Arragon,
                        Chippre et Puille, en Romayne font prendre,
                        En Sezille souvent[2] le[3] bon bouquon
                        Qui la mort fait soudainement descendre.
                                    Car d’envie est leurs cuer trais,
15                    Et Faulx Semblant en leurs euvres pourtrais.
                        Quant ainsi font mourir par leur oultrage
                        Les vaillans cuers, c’est horribles meffais :
                        En Orient servent de tel beuvrage.

                        Faillis de cuer sont en toute saison,
20                    Soubtils es ars qui font les mauvais pendre.
                        Sortileges et enchanteur felon,
                        D’ars deffendus se font mains d’eulz reprendre.
                                    Gardéz vous de leurs agais
                        Et des Lombars, soiés subtilz et gays,
25                    Vous d’Occident. Ilz dient un langaige
                        Et autre font, leur boire est doubteux, mais
                        En Orient servent de tel beuvrage.

[1] Ms. mourdris

[2] Ms. sonner

[3] Ms. li