Balade 354 : Las, je ne puis reposer ne dormir (CCCCLXIV)
Balade
Las, je ne puis reposer ne dormir,
Joye, deduit, ne nul repos avoir,
Pour le penser et le doulx souvenir
Qu’Amour me fait en mon cuer concevoir
5 De ma dame que j’aym sanz decevoir,
Pour matin suy levéz maintes foiz.
Pou m’a valu, si puis dire pour voir :
A main lever ne gist pas li esplois.
En tout ne chiet que grace et doulx plaisir,
10 Lieu, heure et temps de faire son devoir.
Petit y vault trop souvent poursuir : 154c
Je le puis bien par mon fait percevoir
Qu’en un moment ay veu recevoir
Guerdon d’autrui et j’ay plus de .v. roys[1]
15 Amour servi, qui me fait assavoir :
Au main lever ne gist pas li esplois.
Je ne sçay mais a quelle heure venir,
Ne en quel temps, au matin ou au soir.
Esbahy suy quant je voy retenir
20 Les tars venus. par ce pers mon espoir.
Sers suy d’amours et d’autre fait son hoir.
Sanz guerredon suy trop pour lui destrois.
Si dy du cuer sanz nullui decevoir :
Au main lever ne gist pas li esplois.
[1] Ms. curoys
