Balade 353 : Qui saroit bien la biauté que je sçay (CCCCLXIII)

Autre Balade

                        Qui saroit bien la biauté que je sçay
                        Le gentil corps et la doulce figure,
                        Humble regart et le doulx maintien gay,
                        Le biau parler, la belle creature,
5                      Le bon advis et l’arroy par mesure,
                        Le noble atour et la royal lignee
                        Dont celle vient, sa bonne nourriture,
                        Plus l’ameroit que creature nee.

                        Longue et droite est, jeune, et encor diray
10                    Que plus gente ne fist oncques Nature.
                        Quinze ou .xvi. ans a la rose de may :
                        C’est le droit point de jeunesce en verdure.
                        Meilleur de lui n’a tant com terre dure,
                        Ne en tous cas si bien endoctrinee.                                                  154b
15                    Car qui verroit sa doulce pourtraiture
                        Plus l’aymeroit que creature nee.

                        J’en parole pour ce que veue l’ay.
                        C’est pour un roy tresjoieuse pasture.
                        Angle la vy comme je l’avisay,
20                    Saige en ses fais en maniere seure,
                        Doulce en son chant sanz trop d’envoiseure.
                        Par tout lui est tournee destinee.
                        Se roys savoit ses vertus, je vous jure,
                        Plus l’aymeroit que creature nee.

                        L’envoy

25                    Princes qui a a maintenir droiture
                        Doit en tel flour mectre s’amour et cure
                        Et [en] faire royne couronnee,
                        Car de tel fleur naist l’yaue necte et pure.
                        Et s’il savoit com c’est bonne aventure,
30                    Plus l’aymeroit que creature nee.