Balade 352 : Dame, au jour d’uy m’a vostre doulce face (CCCCLXII)

Autre Balade

                        Dame, au jour d’uy m’a vostre doulce face
                        Et vo maintien si pris et retenu
                        Que je ne sçay que mon las de cuer face.
                        Plain de desir et d’esperance nu.
5                      De vous en moy est le penser venu
                        Qui me fera langui en grief doulour
                        Ou je seray jusqu’a mort maintenu,                                                  154a
                        Se pitié n’est, octroy, grace et amour.

                        Vostre grant bien et vostre biauté passe
10                    Toutes autres, toudiz l’ay soustenu.
                        Vous estes li esmeraude et topace,
                        Rubis, saphir, vray dyamant tenu,
                        Mais vo cuer est dyamant detenu,
                        Emmis le mien aussi dur qu’une tour,
15                    Dont je languy. S’en ay mon sens perdu,
                        Se pitié n’est, octroy, grace et amour.

                        Or me vueillés donques donner la grace
                        Que nom d’ami soit par vous avenu
                        A moy qui suis voz serfs en toute place
20                    Et de qui bien m’est tousjours souvenu.
                        Par vo douceur soit mon cuer retenu
                        De vous, dame, que j’aym en toute honnour,
                        Ou autrement sui mort et confondu,
                        Se pitié n’est, octroy, grace et amour.