Balade 351 : Las, douloureux, desconfortéz, dolens (CCCCLXI)

                        Las, douloureux, desconfortéz, dolens,                                            153d
                        Lens en espoir, prochains de desconfort,
                        Fort assaillis des pensers que je sens,
                        Sanz ma dame ne puis avoir ressort.
5                      Sort de pité, faictes de moy rapport.
                        Port de salut, mon cuer a toy pourchace,
                        Chace de moy, desespoir qui m’estort :
                        Tort a Amour, se par amer n’ay grace.

                        Grace ! douleur me sourt par mesdisans.
10                    Ens en mon cuer ont ja painte la mort.
                        Mort suy par eulz, de leurs diz ygnoscens.
                        Senz et raison le tost croire remort,
                        Mort de mesdit a mon cuer si s’amort.
                        Ort et villain est le point de sa face.
15                    Face raison, jugement m’ont bestort :
                        Tort a Amour, se par amer n’ay grace.

                        A ce jurer puis que suis ses servans :
                        Vens de jangler, saige homme s’i endort.
                        Dort loyaulté ? non pas pour ses sergens,
20                    Gens amoureux si n’aroient nul port.
                        Port m’a faussé celle ou j’espoir confort.
                        Fort de vertus qui tous vices[1] en chace,
                        Chasse d’onneur, sanz vous mon bien dessort :
                        Tort a Amour, se par amer n’ay grace.

[1] Ms. tout vice