Balade 350 : A doulce flour prochaine du doulx lis (CCCCLX)

Autre Balade[1]

                        A doulce flour prochaine du doulx lis,
                        A la douçour du miel [a]comparee,
                        A la valour et oultre tous delis,
                        A la coulour de trestous bien paree,
5                      A grant honnour des autres separee,
                        A qui toutes en tout bien refuge ont,
                        A vous me rent, rose trescoulouree :
                        Aidiéz vo serf qui en lermes se font.

                        Au douloureux qui n’a cure de lis,
10                    A tousjours mais de vie desesperee,
                        Aidier vueillés : trop est ensevelis.
                        A sa douleur de long temps esperree,
                        Au grant desir qui lui a fait entr’e,
                        A souvenir que desespoir confont,
15                    A mort ferir, humble fleur desiree,
                        Aidiéz vo serf qui en lermes se font.

                        Autrement muert. De voz biens assaillis,
                        A grant langueur. Pour ce a voix esplouree,
                        A vous requiert trois qui lui sont faillis :
20                    Amour, pité, esperance qui gree
                        A tous octroy en la doulce contree
                        Amoureuse, car ces .iiii. cy font
                        A maint amant dire a dame honnoree :
                        Aidiéz vo serf qui en lermes se font.

[1] Balade dont tous les vers commencent par <a>