Balade 347 : Qui est amour, ne la conclusion (CCCCLVII)
Balade
Qui est amour, ne la conclusion
De quoy amans veulent a chief venir ?
C’est un plaisirs conceuz par vision,
Continuéz[1] par un doulx souvenir
5 De la biauté d’aucune retenir,
Ou d’en oir parler par aventure,
Qui ne se puet de leurs cuers departir,
Tendans a fin de doulce nourriture.
Tuit li amant ont ceste entencion,
10 Et leur semble qu’Amour les doit merir,
Quant a lui seul ont leur affeccion,
Et qu’i[2] veulent toute paine souffrir
Et endurer pour leur dame servir
Et y mettre cuer, [penser], corps et cure.
15 C’est en ce cas leur principal desir,
Tendans a fin de doulce nourriture.
Dont je conclus qu’en delectacion
Se doit Amour et en joye fenir
Secretement, et tel finicion
20 Ne devroit jamais des cuer[s] departir,
Car qui le joint, il est pis que martir.
Et si peche dame contre nature
Qui ne laisse son doulz amans joir, 153a
Tendans a fin de doulce nourriture.
[1] Ms. Continuer
[2] Saint Hilaire corrige en qu’il