Balade 346 : Dames, dames, que j’ay long temps servi (CCCCLVI)

Autre Balade

                        Dames, dames, que j’ay long temps servi
                        Depuis qu’Amours m’ont donné cognoissance,
                        Et en tous cas vous loé et chery
                        Et emploié cuer et corps et puissance,
5                      Et en mes dis de joieuse plaisance
                                    Parlé amoureusement,
                        Priéz pour moy, car mon deffinement
                        Voy aprouchier et le temps de ma biere.
                        Le treu parray de mort prochainement,
10                    Se de Dieu n’ay secours a vo priere.

                        Las ! des que j’oy .xiiii. ans et demi,
                        Je me sousmis a vostre obeissance.
                        Si devri&z avoir pitié de my,
                        Et vo servant avoir en remenbrance.
15                    Or vous suppli, doulces dames de France,
                                    De prier devotement
                        Nostre Seigneur pour mon alegement,
                        Et, se je muir, aiéz ma tombe chiere,
                        Car sanz retour vois au grant mandement,
20                    Se de Dieu n’ay secours a vo priere.

                        Et s’il convient que je departe ainsy,
                        Vueillés oir ma piteuse ordenance :                                                  152d
                        Je crie a Dieu de mes torfais mercy.
                        A mes homs laiz ma petite chevance.
25                    Le corps aux vers fera sa penitance.
                                    Or ait l’ame sauvement !
                        Vestéz vous blanc pour moy au remenant,
                        Car de purté porte blanc la lumiere.
                        Et d’eschapper n’ay espoir nullement,
30                    Se de Dieu n’ay secours a vo priere.