Balade 345 : Puisque je voy Amours des cuers partir (CCCCLV)

Autre Balade

                        Puisque je voy Amours des cuers partir
                        Et que Joie est du monde departie,
                        Il me convient d’avec eulz departir
                        Et dire adieu a l’amoureuse vie.
5                      Je voy regner trahison et envie,
                        Mesdit, despit, deshonneur a toute heure.
                        Noblesce fault, il n’est nul qui bien die.
                        Adieu, bon temps, drois est que je te pleure !

                        A tristece me convient consentir,
10                    A desconfort et a merencolie,
                        A Faulx Semblant qui ne fait que mentir,
                        A Faulx Cuidier qui conduit Jalousie.
                        Et, d’autre part, voy venir Villenie
                        Qui chascun jour o les plus grans demeure.
15                    Las ! tel doulour apris n’avoye mie :                                                  152c
                        Adieu, bon temps, drois[1] est que je te pleure !

                        Je souloie vous, mes dames, cherir
                        En mes chançons et en ma melodie[2],
                        En tout honneur vous ay voulu servir,
20                    Et en tous cas y ay mis m’estudie.
                        Or dy adieu, tresdoulce compaignie.
                        Priéz pour moy, nul n’est qui me sequeure.
                        Au jour d’uy n’est parfait n’amy, n’amie :
                        Adieu, bon temps, drois est que je te pleure !

[1] Ms. temps

[2] Ms. maladie